自慰及性愛素來被認為係「影響運動表現」嘅原因之一，所以唔少運動員面對重要比賽前都會禁慾一段時間。但英國重量級拳王Tyson Fury日前接受訪問時，就笑稱自己嘅成功係來自一日自慰七次，更笑言「用左手定右手就視乎心情」，而佢亦早於2020年接受另一個訪問時，就已經話潤滑劑係佢人生不能或缺嘅十件物品之一，似乎真係有長期、密集自慰嘅習慣。咁究竟自慰對於男性體力究竟係有害定有益呢？連動表現唔好係咪因為自慰得唔夠呢？

Tyson Fury

圖片：gypsyking101 on IG

首先，「一日七次」呢個數字大家講就講得多，但實際做到嘅人幾乎係寥寥可數。據成人用品生產商Arcwave抽查來自17個國家、超過7,000名男士嘅自慰習慣數據後得知，世界上只有57%男性每星期會自慰至少一次，而喺呢57%人當中，平均每星期自慰次數為4.54次 (順帶一提，女性數字係3.43次)。如果以國家分類，每星期自慰最多次嘅係加拿大男性，每星期5.21次，而自慰得最少嘅就係我哋——香港男性——只有3.19次。

但無論你點計，呢個數字都同Tyson Fury聲稱嘅一日七次、一星期49次相距極遠，證明自慰習慣呢家嘢真係非常因人而異。而據西班牙性學家Sergio Fosela指，自慰時人體內的確會分泌更多睪丸素，而睪丸素與運動表現又的確有關，但睪丸素水平會於男性高潮後火速回到正常水平，睪丸素分泌亦與本身嘅飲食習慣、體型、運動習慣及性生活頻密度有關，所以實際效果其實都係因人而異；澳洲男性學家Cam Fraser就指，雖然自慰頻率及體內睪丸素多寡係成正比，但目前未有研究證實兩者邊個係因、邊個係果 (係自慰得多所以睪丸素多，定因為睪丸素多所以先自慰得多)，所以目前都係睇個人習慣及體質，先知自慰對運動表現有冇幫助。

而臨床心理學家Christopher Ryan Jones就指，世界上係冇一個「最佳自慰次數」，只要唔影響返工返學、正常人際關係及責任，一個人想自慰幾多次都得，「但如果你以為一日自慰七次就可以變到Tyson Fury咁勁，咁Sorry，係唔會發生嘅！」所以對我哋呢啲普通人黎講，重點似乎係應該放喺透過自慰增加自己嘅歡愉，而非盲目追求次數，以期望能夠成為下一為重量級拳王。

資料來源：Arcwave