香港唔少人都係貓奴，而以往唔少研究都講過，貓奴們之所以會對主子死心塌地，係因為貓身上有種叫「弓漿蟲 (Toxoplasmosis)」嘅寄生蟲，而感染呢種寄生蟲嘅其中一個病徵，就係會不知覺地被貓所吸引。而一個研究就發現，弓漿蟲原來都對大家嘅性行為有影響。

根據2016年一個研究，搜集近6,000名人士有否感染過弓漿蟲、以及各自嘅性習慣、喜好等數據後，發現感染弓漿蟲嘅人對「更傾向被非常規嘅性行為所吸引，特別係與BDSM相關嘅行為。」而所謂「BDSM相關行為」就包括綑綁、暴力、人獸、戀物癖等，報告仲特別提到男性弓漿蟲感染者對被虐、強暴及被強暴等主題特別有興趣。

報告指呢個發現，與弓漿蟲「改變感染者對恐懼及危險的觀念」相吻合。以往亦有研究指，感染弓漿蟲嘅老鼠會喪失對貓嘅恐懼，甚至會主動接近。

不過，研究亦講到明，即使弓漿蟲對大家嘅性喜好有所影響，其幅度亦相當有限，絕對唔係一個人鍾意呢種性行為方式嘅主要原因。換言之如果你係鍾意以上嘅行為，係你嘅事，唔好瀨落隻貓到呀下！