OpenAI於美國時間週四晚發出公告，指佢哋與Disney達成協議，後者除咗會向OpenAI投資10億美金之外，更會向OpenAI開放來自Marvel、Pixar及Star Wars系列、超過200個角色嘅使用權，未來用家唔單止可以用OpenAI嘅影像生成模組Sora製作上述角色嘅影片，其成品甚至有可能登上Disney+播放。

就咁睇你係咪覺得Disney一反以往「見人就告」嘅強勢，似乎慢慢放寬對於版權嘅保護？不過有分析指出，Disney之所以會同OpenAI合作，其實係為咗對沖AI帶來嘅沖擊，以及確保即使AI創作未來成為主流，佢哋依然能佔有一席之地。

圖片：OpenAI

據《CNN》報導，雖然目前AI嘅發展及潛力仍然未算清晰，但對Disney呢種規模嘅娛樂創作公司黎講，係唔可能等到日後AI生成內容真係成為主流之後先上船。所以今次向OpenAI投資兼開放版權，其實就係為咗減低未來風險嘅提早部署。有咗呢次合作，即使AI未來改變整個娛樂產業生態，Disney至少都已經參與其中，不至於完全被動。

更值得提嘅係，喺OpenAI公佈與Disney合作嘅同一日，Disney向Google送上一封「停止並終止信函」，指對方「大規模」侵犯其版權；而僅半年前，Disney又同另一荷里活大廠Universal一同控告另一生成式AI Midjourney，話佢哋協助用家創作侵犯自家版權嘅內容——亦即係佢哋依家容許OpenAI做嘅同一樣嘢。從呢兩件事就可以知道，與其話Disney「擁抱AI」，不如話佢哋喺咁多間AI公司中揀咗OpenAI黎抱。

之於點解係OpenAI？Emory大學AI及機器學習法律教授Matthew Sag就指出Google規模太大、而且與Disney過往有太多法律糾紛，雙方難以合作；Midjourney又規模太細，唔符合Disney嘅要求。對比之下OpenAI就唔大唔細啱啱好。

總結而言，Disney與OpenAI合作之後，能夠某程度上控制自家角色點樣被AI利用、同時又可以從OpenAI拎到版權費，仲順便拎到10億美金嘅OpenAI股份；而OpenAI拎到Disney角色版權，鞏固Sora嘅地位，而且至少有一段時間唔使擔心畀Disney告，同時又拎到10億美金投資（雖然同Sam ALtman上個月話黎緊8年要掉1.4兆美金去起數據中心比絕對係杯水車薪）。都算係一個雙贏嘅結果黎。

資料來源：CNN、OpenAI