自從 ChatGPT 喺 2022 年尾推出之後，好多人已經由以往嘅「唔識問Google」變成「唔識問AI」，事關後者唔單止會幫你搜尋資料，仲會幫你快速整理，效率比起自己慢慢Search要高得多。不過賓夕法尼亞大學市場學學者 Shiri Melumad 最新研究就提醒大家，呢種透過AI「學習」嘅方式，可能令你對主題嘅理解反而變得更淺薄。原因正正就係為AI太「方便」啦！

圖片：ImageFX

Shiri Melumad與另一位來自新墨西哥州立大學嘅同僚Jin Ho Yun進行咗一系列研究。第一個研究先搵黎超過1,100名參與者，然後將佢哋隨機分派用 ChatGPT 呢類 LLM 或傳統嘅Google搜尋去學習一個特定主題（研究中用「喺花園種菜」），然後再將學到嘅嘢寫成一篇「畀朋友嘅建議」。結果發現，使用ChatGP學習嘅一組覺得自己學到更少、花更少時間去寫嗰篇建議，寫出黎亦更短、更空泛、更少事實佐證。而搵第三組成去評論寫出黎嗰篇建議時，亦指出「LLM組」寫嘅有更少資訊，更不傾向被採納。

為咗避免差異源自LLM及Google搜尋結果於事實層面上嘅分別，所以研究團隊又做咗兩個復續實驗，先係確保LLM及Google搜尋都擁有一模一樣嘅資料庫，第二就直頭唔用LLM，改為用Google新出嘅AI總結與傳統Google搜尋作比較。結果發現只要係有AI參與，就會令使用者嘅學習成果更加淺薄。

圖片：ImageFX

作者解釋，關鍵在於學習其實係需要「摩擦力」（Friction）。自己 Google 要揀網站篤入去、然後又要睇內文、又要比較整合，過程雖然麻煩，但正正因為有主動處理資訊，所以會對主題形成較深、較獨特嘅理解；相反，LLM 幫你做晒呢啲工夫，學習就變成被動吸收，整個過程太順滑，自然難有深度。

作者亦強調，研究結果唔係叫大家唔好用AI幫手學習，而係要做個聰明嘅用家，知道幾時、點用AI輔肋。佢話如果只係快速地搵單一事實答案，AI的確可以勝任，而且又快又方便。但如果係希望建立真正嘅知識，單靠AI就可能會影響學習深度。

資料來源：Science Alert