對於鍾意復古打機又鍾意波鞋嘅人嚟講，呢對「AIR SNES」幾乎係夢幻聯乘。為咗慶祝超任（Super Nintendo／日本稱 Super Famicom）喺日本推出 35 週年，巴西設計師 Gustavo Bonzanini 將一對 Nike Air Max 90改造成一部超級任天堂，駁咗三色線之後真係可以打機，仲可以用埋原裝手掣，都算係另類嘅「行到邊打到邊」啦？

從外表黎睇，「AIR SNES」基本上就係一對普通紫色Air Max 90。但細心留意的話，於右腳鞋舌上可以見到三色線嘅插口——而左腳就真係普通波鞋黎。值得一提嘅係Gustavo Bonzanini並唔係將一部原裝超任縮細後放入成隻鞋到，而係用體積細小嘅 Raspberry Pi Zero W 做核心，搭配RetroPie 模擬器跑超任遊戲。於是即使連埋可提供30分鐘續航力嘅電池，以及為咗復古風而加嘅三色線插口，整部機都只佔據右腳鞋舌位置，換言之理論佢仍然係一對著得出街嘅波鞋——舒唔舒服就另一回事啦下。

操作方面，部機本身係可以配合原裝 SNES 手掣使用。但為咗唔好有線吊吊揈，Gustavo Bonzanini用 8BitDo 的改裝套件，將原裝手掣改成支援藍牙。喺復古遊戲潮流同球鞋文化愈炒愈熱嘅今日，相信如果量產一定有人搶，不過 Bonzanini 表明 AIR SNES 只係一次性創作，冇計劃商品化，暫時只能喺網上望梅止渴。

資料來源：The Verge、@bonzanini.design