Meta全新智能眼鏡概念圖（由ChatGPT生成）

隨著手機技術發展逐漸遇到瓶頸，近年唔少科技大廠都開始另闢蹊徑，積極研發智能穿戴裝置，延伸手機功能。最近有傳專注於VR/AR裝置及智能眼鏡嘅Meta，將於下月正式推出代號為「Hypernova」嘅新一代智能眼鏡，其最大特色在於右邊鏡片內建一個抬頭顯示器（HUD），讓用家能夠即時瀏覽各種資訊。

據《Bloomberg》記者Mark Gurman報導，Meta計劃下月推出首款搭載抬頭顯示器嘅智能眼鏡，其右側鏡片會內建一個小型HUD，方便用戶能夠查時間、天氣、訊息同導航等資訊。與此同時，呢款眼鏡亦會配備現時Ray-Ban Meta嘅功能，例如可以影相拍片、聽歌、仲內建咪高風支援Meta AI助理。除此之外，Meta仲會同步推出一款「神經腕帶（neural wristband）」，用家戴上後可以透過手勢作出「滑動」及「點擊」等操作。

報導提到，Meta在開發Hypernova期間，原本預計定價至少為1,000美元，有業內人士更估計定價將高達1,400美元，遠高於現時嘅Meta Ray-Ban及Oakley Meta HSTN智能眼鏡，價格直逼一部高階iPhone。好消息嘅係，據Mark Gurman收到嘅消息，Meta為咗吸引更多人購買，願意壓低利潤將起步價定在800美元，呢個亦係推出新產品時嘅常見策略，但如果用家想選配特別鏡框或有度數鏡片就需要額外加錢。