現代人「生活」於網上世界嘅時間，分分鐘比於現實世界更多。但其實網上世界可以非常危險，而且有時啲危險仲來自啲你估佢唔到、甚至有啲無厘頭嘅地方。例如網絡安全公司「SOPOS」近日就發出緊急警告，呼籲網民唔好於Google搜尋「Are Bengal Cats Legal in Australis（孟加拉貓於澳洲合法嗎）」，否則就有可能被駭客入侵。

據SOPOS指出，上述字句嘅頭幾個搜尋結果，均係看似正常無害、實際隱含惡意軟體載入工具GootLoader嘅虛假網頁。只要網民按進呢啲網頁，Gootloader就會自動於下載並安裝一系列病毒程式，除咗會盜除存於電腦上嘅個人資料，例如信用卡資料等。同時駭客亦可以遙距鎖上電腦，繼而勒索金錢。

SOPOS指出呢啲含有惡意程式嘅搜尋結果，只會於搜尋字句包括「Australia」時先會出現，換言之駭客似乎係針對當地居民。而縱然呢啲關鍵字似乎相當冷門，但SOPOS認為大家應該對呢個手法提高警覺，亦說明並非只有搜索色情內容時大家先需要小心。

SOPOS展示嘅其中一個惡意網站。引誘用家下載含有惡意軟件的壓縮檔

圖片：SOPOS

呢種利用Google搜尋結果散播惡意軟件嘅方法名為「SEO下毒」。顧名思義，駭客先製作含有惡意軟件、但內容看似正常嘅網站，然後想辦法令網站於Goolge搜尋器嘅算法中獲得高分（亦即所謂Search Engine Optomization），令網站於網民搜尋待定字眼時出現於較高位置，從而引誘大家無意中撳入去。SOPOS強調網民只需要撳入去呢啲網站，就已經可能中毒，所以大家搜尋資訊時，可能要花多兩秒辨別網站是否可信啦。

資料來源：SOPOS