AI慢慢進入大家嘅生活方方面面，並開始引起一啲新嘅社會問題。例如早前有電話品牌內置嘅AI改圖功能，竟然能夠對相中人「一鍵脫衣」；而有類似「裸體化（Nudify）」功能嘅P圖App亦如雨後春筍一樣紛紛冒起，《New York Times》曾將此類App描述為「在學校中迅速蔓延的新型朋輩性剝削和騷擾形式」。而喺呢個風尖浪口之上，有人發現AI龍頭「OpenAI」早前發佈嘅一份新文件透露，未來可能會開放用家利用旗下ChatGPT等AI模型生成色情內容。

OpenAI上週發佈「規範OpenAI API及ChatGPT中不同模式的應當行為」嘅「Model Spec」首個版本。當中就寫道：「AI助理不應提供NSFW內容，即不適合於專業場合出現的內容，例如色情、極度血腥、詆毀及未經請求的粗俗行為」，但更重要嘅係下面有句「評語」表示：「我們認為只要遵守我們的使用指引，開發者及用家應該有自由運用我們服務的靈活性。我們正在審視是否能夠負責任地，於年齡合適的場景，提供生成NSFW內容的能力。我們希望進一步了解用家及社會對這一方面的期望。」

而有份撰寫呢份文件嘅OpenAI模式主管Joanne Jang接受《NPR》訪問時進一步表示：「我們希望用家於不違反法律或人權的情況下擁有最大的控制權。但開啟Deepfake（AI換臉）功能就一定不可能。這不代表我們嘗試製作AI色情片。」佢亦表示大家對於咩叫「成人影片（Porn）」嘅定義各有不同，「只要不包括Deepfake，這（怎樣才算是Porn）正是我們想知道的。」

以下均為AI生成圖片

圖片：Civitai Gallery | AI-Generated Art Showcase

而研究Deepfake案例嘅San Francisco大學法律教授Tiffany Li就警告，開放AI生成NSFW內容「造成嘅傷害可能會比好處多」，而來自Stanford大學嘅Renee DiResta亦認同此舉會有「重大風險」，但就表示「向大家提供一個有將安全納入考慮嘅合法成人影片渠道，好過大家去搵不安全嘅方法」。

資料來源：NPR