唔少人都抱怨依家啲手機一式一樣，愈嚟愈冇新意，將個Mon整大少少，相機改勁少少就新型號賣，緬懷舊時Sony Ericsson、Nokia、Motorola嗰種百花齊放嘅年代。查實早幾年LG都好努力嘗試更多唔同設計，相繼推出Mon及旋轉Mon手機，甚至打算出部捲Mon機「Rollable」，但可惜部機未上市LG就宣布退出手機市場。最近有位韓國Youtuber就搵到呢部胎死腹中嘅得意之作，並且拍片開箱介紹。

從片中可見，當用家做出特定滑動手勢，螢幕就會慢慢延長，從6.8吋變成7.4吋，整個伸縮過程大約3秒內完成，捲軸內嘅摩打甚至大力到可以將三本厚書推開，不過就唔個摩打易唔易壞。

至於規格方面，LG Rollable搭載Snapdragon 888 處理器、12GB Ram、256 GB Rom，電池容量4500mAg，屬於當年旗艦機水準。不過重量就高達285g，比Samsung Galaxy Z Fold4(263g)及iPhone 14 Pro Max(240g)重得多。