作為一個男人，我哋都可能唔明白胸圍嘅重要性，但平時喺廣告上都稍為了解到其中一個重要指標就係貼身包覆性好。有見及此，法國有廠商就推出3D打印定制胸圍服務，但客人需要事先自拍心口，掃瞄將近2分鐘提供數據，廠商強調資料絕對保密，而且所影嘅只係3D數據並非真實圖像。

據法國廠商Braave介紹，打算度身訂製專屬胸圍「Fusion Bra」嘅客人，首先要用佢哋嗰App掃瞄自己心口2分鐘製作出乳房3D圖像，其背後原理就同iPhone嘅Face ID差唔多，同樣需要用到原深感測相機鏡頭，所以嗰App只支援使用iPhoneX或以上嘅客人，Android用家更加冇份。數據經加密後會傳送到廠商，然後佢哋就會3D打印出專屬嘅UnderFit，比起傳統鋼線更加舒適，而其餘部份則由超柔軟織物製作而成。

除此之外，客人仲可以將自己嘅乳房化身藝術品，將掃瞄得出嘅3D數據交畀廠商，就可以用US$39製作出獨一無二嘅胸部3D打印半身像，當成擺設咁放喺屋企展示。唔知呢間廠商有冇打算做埋男性市場，推出3D打印底褲呢？