過去半個世紀，人類想將衛星或飛行器送上太空，只能依靠傳統火箭或太空飛機，耗費大量燃料。近年美國初創公司SpinLaunch就設計出一款全新發射器，並於日前完成首次試射，原理就好似大家玩鏈球，首先透過巨型轉臂幫火箭加速，最後「放手」一嘢拋上太空。

由於傳統運載火箭需要使用大量燃料，而燃料同推進器嘅重量本身亦係負載嘅一部份，所有時運送一件細小裝置上太空，都要用上嗰件裝置好幾倍重量嘅燃料，整體能源效益極低。而SpinLaunch所設計嘅發射器，就係希望能夠直接將裝置拋上太空，從而減少大量燃燒消耗，降低發射成本。

其運作原理簡單嚟講，就係將火箭（或裝置）綁喺巨型轉臂末端，然後發射器內部會抽真空、轉軸亦用上磁浮設計，務求將摩擦力降到最低。再透過電力驅動轉臀，將火箭加速到8000km/h（即音速6倍以上），最後藉住巨大離心力將火箭一嘢將拋上天。

雖然聽落成件事好科幻，但SpinLaunch確實整咗一部50米高嘅原型機出嚟，並喺上個月完成首次試射，用咗20%功率就成功將模擬火箭拋上數萬英呎高空，預計發射器正式版本體積將會大3倍。不過SpinLaunch發射器最大問題在於火箭加速至8000km/h嗰陣，會承受超過10,000個G力，人類絕對冇可能承受得到（人體極限為承受9G），代表只有相對堅固嘅人造衛星可以用呢個發射器發射。