隨住大家身上「有Mon嘅嘢」越黎越多、而且啲Mon又越黎越大、越來越清，唔少用家都面臨一個「Quality of Life」嘅問題，就係啲Mon印咗手指紋上去之後好難清。係，係就係可以用塊眼鏡布、用酒精紙片抹咗佢，但抹得唔夠乾淨點算？整花個Mon又點算？Apple就係知道呢個問題非常困擾大家，所以佢最新推出咗一塊布！

圖片：Apple 官網

呢塊價值HK$149嘅「擦拭布」，乃係Apple「最新推出」嘅產品，官網非常簡單咁話佢係「以柔軟而不會造成磨損的物料製成，讓你安全有效地清潔任何 Apple 顯示器，包括 nano-texture 玻璃」。雖然百幾銀買塊布好似有啲傻仔，但其實Apple出呢塊布並唔係單單為咗測試大家嘅信仰。卻說Apple近年推出幾款用上nano-texture玻璃嘅產品，而官網亦講到明，如果想清潔個Mon就必須用附送嘅呢塊「擦拭布」，否則有可能會損壞玻璃表層。

而喺未「推出」呢塊擦拭布之前，用家就只有買機送嘅嗰一塊，萬一唔見咗就要搵客服重新買過一塊。依家拎塊布出黎單賣，其實就係為咗方便客人直接訂購。咁當然，你拎佢去抹其他Apple產品都冇問題嘅，Apple官網仲話塊布適用於iPhone 6、iPhone SE、第一代iPad Air、iPad Mini等多款舊產品，就連冇Mon嘅iPod Shuffle都用得架。