無論係科幻片定遊戲，大家經常可以見到主角揸住飛行電單車嘅畫面，如今呢種情節即將實現。曾開發噴射背包嘅美國公司Jetpack Aviation（JPA）近日宣布，佢哋研發嘅飛行電單車「Speeder」原型機已通過飛行測試，預計最快2023年正式推出。

據官方介紹，Speeder（Recreational Version）採用4個渦輪噴射引擎提供升力，能夠承重108kg，每次飛行時間約10-22分鐘。而且具備自動隱定及垂直起降功能，甚至可以透過程式設定自動飛行，只需要一部汽車咁大嘅空間就可以起飛及降落。

除咗上述所講嘅Recreational版本，JPA計劃將來會推出一部飛行時間約15分鐘、最高時速為96km/h嘅Ultralight版本，無須飛行執照都可以駕駛，以及承重量同飛行時間翻陪嘅軍用版本，幫助政府單位快速運送設備及傷者。現時Recreational版本已開放預定，售價為380,000美元（約$296萬港幣）。