今日稍早時間Apple官網無預警咁上架傳咗好耐嘅MagSafe外接式電池 ，能夠透過磁吸方式「黐」喺機背，為iPhone 12系列進行無線充電。雖然電池容量只有1,460mAh，而且售價為$749，但考慮到外觀設計咁靚仔，同埋唔使帶多條充電線出街，唔知大家會唔會買返個呢？

MagSafe外接式電池具有Lightning接口，官方建議搭配27W或更高嘅充電器以獲得最快嘅充電速度，而且當接上大於20W以上嘅充電器嗰陣，電池可以以最高15W功率為iPhone 12系列充電。不過如果當成「尿袋」唔駁線咁出街用，MagSafe就只會以5W功率為手機充電，所以如果想短時間內補充電力，都係用返插線嘅「尿袋」會比較快。

值得一提嘅係，今次MagSafe外接式電池同時解鎖咗iPhone 12嘅反向無線充電功能，當iPhone同MagSafe「黐埋」一齊嗰陣，只要搭配不低於20W嘅充電器，無論你插線落部手機定係嚿電池，都可以同時為兩者充電。如果將電線插入電池，電池就會先將手機充電到80%之後先幫自己充電。