工作不如意，返工返到苦口苦臉？好彩你唔係Canon中國子公司員工，否則連Office都入唔到！大企業透過科技手段監控員工雖然已經唔係咩新鮮事，但要微笑先可以入Office咁有創意嘅諗法就真係第一次聽。據英國《金融時報》報導，Canon集團中國子公司「佳能信息技術（北京）」上年引入「微笑辨識」系統，員工進入Office及會議室前要對住鏡頭微笑，再由AI分析你個人夠晒開心先放你入去，公司表示咁做係希望令大家喺後疫情時代會更歡樂。

（圖片截自：theverge）

據報導所指，自呢套系統出現之後，有員工就喺微博大呻公司依家唔只監控我哋工作時間及生產力，就連情緒都要管埋，覺得呢種技術有冒犯成份。但公司就唔係咁睇，Canon中國一位發言人向傳媒表示，覺得員平時太怕羞唔敢笑，認為呢套系統可以培養員工微笑習慣，當大家慣咗笑口常開，就可以營造出辦公室積極氣氛。

唔少人都怕科技帶嚟嘅監控問題會演變到好似《Black Mirror》咁極端。

事實上唔單只中國，全球都有唔少大企業透過科技手段監控員工表現，例如電商巨頭Amazon就會用演算法分析員工生產力並進行排名，藉此炒走最低效率嘅員工。之前亦報導過Amazon將倉務工作遊戲化，員工可以喺「搬貨遊戲」賺取代幣換領獎品，當時就有人話公司透過遊戲手段暗地裡剝削員工。另外，由於疫情問題，外國有唔少大企業亦會透過Microsoft 365內建嘅「生產力分數（Productivity Score）」功能嚟分析員工在家工作嘅效率，睇下佢哋有冇偷懶。

對於呢種現象，倫敦國王學院學者Nick Srnicek就認為演算法及人工智能發展唔單只冇取代工人，相反被企業應用喺管理工人層面上，情況就如同18世紀嘅工業革命，科技進步加劇企業對勞工階級剝削。唔知大家又覺得科技進步係幫助提升生產力，取代工人，定抑制係加劇企業對工人嘅監控同剝削呢？

資料來源：theverge、金融時報