坊間一直有傳Apple將會推出無線頭戴式耳筒，結果Apple於香港時間昨晚突然宣佈推出AirPods Max，果然就係無線頭戴式耳筒。

圖片：Apple

據新聞稿指，AirPods Max每邊搭載一個Apple自家設計40mm動圈單元，「提供豐富、低沉的低音，精準的中音與清脆、乾淨的高頻擴展」，而且每邊都有由AirPods 第二代開始使用嘅H1晶片，「還有獨有的聲學設計與先進的軟體，使用運算音訊技術提供最高品質的聆聽體驗」，亦提供主動降噪、通透模式及空間音響效果。

另外AirPods Max亦會利用光學感測器，知道用家係咪戴住耳筒，並於除下整個耳筒或者抬起單邊耳罩時停止播放。亦有波束成形雙麥克風收音。

圖片：Apple

外形方面，睇圖感覺就充滿金屬感，新聞稿就話AirPods Max採用不鏽鋼頭帶框，框內係網面頭帶，提供支撐性之餘亦可以分散耳筒重量；兩邊耳罩亦可以獨立旋轉以配合用家嘅面形，而軟墊就用「聲學工程記憶海綿，有效製造密封效果」。控制方面就用咗好似Apple Watch嘅實體鍵。電池續航力就有20個鐘。

AirPods Max總共有太空灰、銀色、天藍色、綠色與粉紅色五色，售價為HK$4,599，即日起接受預訂，最快下星期二出貨。但執筆之時去官網Check過，目前最快嘅發貨時間都要10-12個星期。