Elon Musk一直提倡以高速地下隧道 + 自動駕駛汽車解決路面交通擠塞問題，而佢哋於拉斯維加斯會展中心、預計快將通車嘅地下隧道系統就被視展示呢個概念嘅大好機會。但根據The Boring Company近日為建立車站而提交嘅文件，有交通專家就認為呢個地下隧道系統其實冇想像中咁神，某啲地方甚至可能比鐵路、巴士等傳統公共交通更加落後。

圖片：Les Vegas Prime Gov

根據The Boring Company於上週公佈嘅資料，美國Rice大學大眾運輸及都市規劃講師Christof Spieler指「啲圖就好似一個讀建築嘅學生用一個學期整出黎嘅功課一樣，我睇唔出佢哋 (The Boring Company) 有仔細地諗清楚成件事係點運作。」Spieler特別提到車站設計：「呢個唔係車站，而係的士嘅上落客區」，並指出呢個設計會令車嘅移動路線重疊，再加上乘客上落車好有可能會走出路中心阻礙運作，令到整體運作速度以及載客量遠少於預期。

圖片：Les Vegas Prime Gov

另外使用Tesla車輛作為「載客列車」亦受到大眾運輸設計師Gerry Tierney批評：「呢個唔係大眾運輸系統，而只係於地底揸電動車嘅系列」，佢指出不論係使用Model 3 定 Model X都係「可笑地冇效率」，一來每架車戴客量奇少，二來乘客必須扣上安全帶先可以安全地開車，三來如果有行李嘅話亦要開車尾箱，而上世紀70年代就已經用緊嘅機場運輸系統 (即係鐵路) 已經解決哂呢啲問題，「睇落就好似夾硬用汽車去解決啲我哋一早就有答案嘅問題。」Spieler指出。

圖片：Les Vegas Prime Gov

專家們另外亦指出車站嘅多個設計問題，包括似乎冇方便殘障人士出入嘅特別通道、似乎冇任何措施製止外來車輛進入隧道等。但佢哋亦承認有可能係因為目前嘅概念圖太過簡陋，冇展示到相關設施出黎。

資料來源：Les Vegas Prime Gov、CNN