早前就同大家介紹過，LG將會推出一部「側Mon機」，早兩日lg就正式確認部機係叫「Wing」，而且唔係側Mon，係轉Mon，其且會於9月14日公佈。而最新就有段片，見到「LG Wing」嘅轉Mon機制，以及大家非常著重嘅機身厚度，其實又真係幾對版喎！

呢段片由Youtube上一個不知名韓文頻道，以「不公開」形式發佈，但就唔知點解被人發現並流傳。短短幾秒鐘就可以見到LG Wing由T字形變成I字形嘅過程，相當順暢之餘，單手操作似乎亦算方便，但更令人驚艷嘅係，當片中人打側部機時，可以見到部機只係比一般單Mon機稍厚，同市面上其他雙Mon機比就薄得多！先唔好理部機入面係咩規格，單單呢個大小同呢個轉Mon機制，都已經相當吸引！