不經不覺HTC VIVE都已經發布一年幾，HTC就趁住早前嘅美國電子消費電子展，正式發表升級版嘅HTC VIVE Pro，將裝置解像度提高至2,880 x 1,660；仲順應民意，推出VIVE無線模組，打機唔使再拖住條長尾。

HTC VIVE Pro今回由1,080 x 1,200升級至2,880 x 1,660雙OLED屏幕，畫質提升78%；像素密度亦提高37%至615 PPI。VIVE Pro同時集成Hi-Res耳機，提供3D立體聲音效，並內置雙主動降噪收音咪，及支援SteamVR Tracking 2.0。設計細節上亦都稍微調整令佩戴更舒適，例如頭帶旋鈕方便調較呎吋同等裝置重量平均分佈、臉墊鼻墊設計可緊貼臉型阻隔光線等等。

之前唔少用家都有反映過，戴住VIVE時最怕拖住長長嘅電線尾，怕Kick親之餘又唔方便活動。HTC就從善如流，推出VIVE無線模組，飛甩長拖尾。模組採用Intel的WiGig技術，可以喺60GHz頻段運作，達到低延遲高效能表現，反應夠快咁話。VIVE Pro定價及開售日期有待公布，VIVE無線模組則預計於今年第三季全球上市。