隨住Denis Villeneuve執導嘅科幻史詩鉅作《Dune: Part Three（沙丘瀚戰：第三章）》將於12月正式上映，今日官方率先公開多張角色海報，同時宣布首條預告片將於明日正式出爐！

今次官方公開嘅造型照可謂資訊量極大，由Timothée Chalamet飾演Paul Atreides造型大變，眼睛四周佈滿皺紋，嘴唇上方更有一條明顯嘅疤痕，似乎經歷咗唔少風霜。而飾演Paul妹妹嘅Anya Taylor-Joy則面容猙獰兼滿臉鮮血，至於Florence Pugh飾演嘅Princess Irulan就好似搽咗海底泥面膜咁，成塊面都白晒帶點詭異感。另外，早前確認「復活」回歸嘅Jason Momoa亦有現身海報，不過整體神態明顯有變。

除咗一眾大家熟悉嘅面孔，最驚喜莫過於Robert Pattinson首度公開角色造型。之前一直盛傳佢會加盟飾演大反派「Scytale」，如今終於有圖有真相。從相中可見，其造型充滿神秘同陰險嘅氣息，完全貼合「變面人 (Face Dancer)」呢個設定，預計今集將會會為Paul帶嚟極大麻煩。

講返今集劇情，《Dune: Part Three》預計改編自原著小說第二本書《Dune Messiah》，時間線設定在首本小說（亦即係頭兩部電影）12年後。講述Paul已成為宇宙皇帝，喺佢統治下，弗雷曼人 (Fremen) 發起聖戰摧毀咗大量星球，導致數百億人喪生。與此同時，各方勢力包括蒙科里諾家族 (House Corrino) 殘黨、貝尼哲斯姐妹會 (Bene Gesserit)、宇航公會 (Spacing Guild) 及改造人種族忒萊素人 (Bene Tleilax) 開始密謀推翻Paul嘅王朝。究竟Paul會點樣應對呢？咁就要等電影上映後揭曉啦，目前電影預計在2026年12月18日正式上映。