以往除非係特別偏愛Apple、又或因為工作需要，否則於預算緊絀嘅情況下，MacBook通常都唔會進人一般人嘅考慮當中。不過Apple早前推出唔使HK$5,000嘅MacBook Neo，似乎有意要打入平價手提電腦市場；而據TrendForce早前發佈嘅報告，Apple於目前因DRAM及NAND（SSD）缺貨導致嘅電腦加價潮中佔有優勢，加價幅度可能會比其他品牌較小。咁係咪代表將來一段時間中，MacBook反而會成為「性價比電腦之選」呢？ 

TrendForce於上週發佈手提電腦市場嘅研究報告，指因為DRAM及SSD缺貨價格上漲，導致未來主流手提電腦嘅價格可能會上升40%。報告指出目前市面上一部售價900美金（約HK$7,000）嘅手提電腦中，DRAM及SSD嘅成本大約佔15%，但於加價潮下就可能翻一倍去到30%。雪上加霜嘅係Intel早前亦提高入門級及較舊款CPU嘅售價15%，更主流或高階嘅CPU預計會於今年第二季跟進。以上種種對於一般電腦品牌都係成本，如果佢哋要維持毛利率、將所有成本轉嫁畀消費者的話，手提電腦價格就可能會暴升。

圖片：Pexels

而Apple MacBook嘅優勢就在於，佢哋嘅Apple Silicon係自家設計，並且與台積電直接合作並簽咗多年生產合約，換言之成本會比其他要問Intel拎貨嘅電腦品牌穩定。當然，Apple亦不能避免受DRAM及SSD價格影響，事實上Apple早前就取消咗Mac Studio升級至512GB Ram嘅選項，升級至256GB Ram嘅價錢亦由$1,600美金上調至$2,000美金。

不過比起其他品牌腹背受敵，Apple嘅加價壓力肯定無咁大。此消彼長之下，話唔定未來MacBook反而會成為「窮人恩物」？

資料來源：TrendForce、MacRumors